|
” کیا کوئی نئی بات سوجھی۔“ فریدی نے کہا۔
” میں کہتاہوں آخر درد سری مول لینے سے فائدہ ؟ کیوں نہ ہم لوگ اپنی چھٹیاں ہنسی
خوشی گذاریں۔“
” اچھا بکواس بند“ فریدی جھلا کر بولا ” اگر تم میرا ساتھ نہیں دینا چاہتے تو نہ
دو۔میں تمہیں مجبور نہیں کروں گا۔“
” آپ تو خفا ہوگئے میرا مطلب یہ تھا کہ اگر آپ بھی اس چھٹی میں ایک آدھ عشق کر لیتے
تو اچھا تھا۔“ حمید نے منہ بنا کر کچھ اس انداز میں کہا کہ فریدی مسکرائے بغیر نہ
رہ سکا۔
” اچھا تو کھانا اس وقت میرے ہی ساتھ کھانا۔“ فریدی نے اس کے کاندھے پر ہاتھ رکھتے
ہوئے کہا۔
” بسرو چشم “ حمید نے سنجیدگی سے کہا ” بھلا میں اپنے آفیسر کا حکم کس طرح ٹال سکتا
ہوں۔“
وہ سرکس شروع ہونے سے پندرہ منٹ قبل ریلوے گراﺅنڈ پہنچ گئے اور بکس کے دو ٹکٹ لے کر
رنگ کے سب سے قریب والے صوفے پر جابیٹھے۔دو چار کھیلوں کے بعد اصلی کھیل شروع ہوا۔
ایک ناٹے قد کا مضبوط نیپالی ایک خوبصورت لڑکی کے ساتھ رنگ میں داخل ہوا۔
” غضب کی لونڈیا ہے۔“ حمید نے دھیرے سے کہا۔
” ہشت“ فریدی نیپالی کو بغور دیکھ رہا تھا۔
” خواتین وحضرات !“ رنگ لیڈر کی آواز گونجی ” اب دنیاکا خوفناک ترین کھیل شروع ہونے
والا ہے۔ یہ لڑکی اس لکڑی کے تختے سے لگ کر کھڑی ہوجائے گی او یہ نیپالی اپنے خنجر
سے لڑکی کے گرد اس کا خاکہ بنائے گا۔ نیپالی کی ذراسی غلطی یا لڑکی کی خفیف سی جنبش
اسے موت کی آغوش میں پہنچا سکتی ہے لیکن دیکھئے کہ یہ لڑکی موت کا مقابلہ کس ہمت سے
کرتی ہے اور اس نیپالی کا ہاتھ کتنا سدھا ہوا ہے ملا حظہ فرمائےے۔“
” کھٹ“ایک سنسنا تا ہوا خنجر لڑکی کے سر پر اس کے بالوں کو چھوتا ہوا لکڑی کے تختے
میں تین انچ دھنس گیا۔لڑکی سر سے پیر تک لرز گئی۔رنگ ماسڑ نے نیپالی کی طرف حیرت سے
دیکھا اور اس کے ہونٹ مضطربانا انداز میں ہلنے لگے۔ دیکھنے والوں پر سناٹا چھا گیا۔
” کھٹ “ دوسرا خنجر لڑکی کے کاندھے کے قریب فراک کے پف کو چھوتا ہوا تختے میں دھنس
گیا لڑکی کا چہرہ دودھ کی طرح سفید نظر آنے لگا۔ رنگ لیڈر نے بے تابانہ رنگ کا ایک
چکر لگا ڈالا۔نیپالی کھڑا دسمبر کی سردی میں اپنے چہرے سے پسینہ پونچھ رہا تھا۔
” کیا اس دن بھی یہ خنجر اس کے اتنے قریب لگے تھے۔ “ فریدی نے جھک کر حمید سے
پوچھا۔
” ہر گز نہیں ہر گز نہیں۔“ حمید نے بے تابی سے کہا۔” ان کا فاصلہ تین چار انچ تھا“
”کھٹ“ اب کی بار لڑکی کے منہ سے چیخ نکل گئی ۔ اس کے بازو سے خون نکل رہاتھا۔فریدی
نے نیپالی کو شرابیوں کی طرح لڑکھڑاتے رنگ کے باہر جاتے دیکھا فوراً ہی پانچ چھ
جوکروں نے رنگ میں آکر اچھل کود مچادی۔
” خواتین و حضرات“ رنگ ماسٹر کی آواز گونجی” مجھے اس وا قعہ پر حیر ت ہے نیپالی
پندرہ بیس برس سے ہمارے سر کس میں کام کر رہا ہے لیکن کبھی ایسا نہیں ہوا ضرور وہ
کچھ بیمار ہے جس کی اطلاع نہ تھی بہرحال ابھی بہت سے دلچسپ کھیل باقی ہیں۔“
” آﺅ چلیں“ فریدی نے حمید کا ہاتھ پکڑ کر اٹھتے ہوئے کہا۔
متعدد خیموں کے درمیان سے گذرتے ہوئے وہ تھوڑی دیر بعد منیجر کے دفتر کے سامنے پہنچ
گئے۔فریدی نے اپنا ملاقاتی کارڈ اند ر بھجوادیا۔
منیجر اٹھ کر ہاتھ ملاتے ہوئے پُر تپاک لہجے میں بولا ” فرمائےے کیسے تکلیف
فرمائی۔“
” میں خنجر والے نیپالی کے بارے میں پوچھنا چاہتا ہوں ۔“
” کیا عرض کروں انسپکٹر صاحب !مجھے خود حیرت ہے۔ آج تک ایسا واقعہ نہیں ہوا مجھے
سخت شرمندگی ہے کیا قانوناًمجھے اس کے لئے جواب دہ ہونا پڑے گا کچھ سمجھ نہیں
آتا۔آج کئی دن سے ا س کی حالت بہت ابتر ہے وہ بے حد شراب پینے لگا ہے“
|
