|
” تم مجھے اچھی طرح جانتے ہو کہ طریقہ کار سمجھ میںآجانے کے بعد میں تنہا کام کرنے
کا عادی ہوں۔“ فریدی نے ہنس کر کہا۔” اور پھر تم نے ابھی حال ہی میں ایک عدد عشق
کیا ہے میں تمہارے عشق میں گڑبڑ نہیں پیدا کرنا چاہتا واپسی میں تمہاری محبوبہ کے
لیے ایک عدد انگوٹھی ضرور لیتا آﺅں گا اچھا اب تم ناشتہ کرکے یہیں سو رہو اور میں
چلا۔“
راج روپ نگر میں نواب وجاہت مرزا کی عالیشان کوٹھی بستی سے تقریباً ڈیڑھ میل کے
فاصلہ میں پر واقع تھی۔ نواب صاحب شوقین آدمی تھے۔ اس لئے انہوں نے اس قصبہ کو ننھا
منا سا خوبصورت شہر بنا دیا تھا۔ بس صرف الیکڑک لائٹ کی کسر رہ گئی تھی۔ لیکن انہوں
نے اپنی کوٹھی میں ایک طاقتور ڈائنمو لگا کر اس کی کمی کو پور کردیا تھا۔ البتہ
قصبے والے بجلی کی روشنی سے محروم تھے۔ کو ٹھی کے چاروں طرف چار فر لانگ کے رقبہ
میں خشنماباغات تھے اور صاف و شفاف روشوں کا جال بچھا ہوا تھا ۔ نواب صاحب کی کوٹھی
سے ڈیڑھ فرلانگ کے فاصلے پر ایک قدیم وضع کی عمارت تھی جس میں ایک چھوٹا سا مینار
تھا۔ کسی زمانے میں ا س مینار کا اوپری حصہ کھلا رہا ہوگا اور نواب صاحب کے آباﺅ
اجداد اس پر بیٹھ کر تفریح کیا کرتے ہوں گے لیکن اب یہ بند کرادیا گیا تھا۔ صرف دو
کھڑکیاں کھلی رہ گئیں تھیں ۔ ایک بار کھڑکی میں ایک بڑی سی دور بین لگی ہوئی تھی۔
جس کا قطر تقریباً ایک فٹ رہا ہوگا۔ اس عمارت میں مشہور ماہر فلکیات پروفیسر عمران
رہتا تھا۔ نواب صاحب نے یہ پرانی عمارت اس کرائے پر دے رکھی تھی۔ اس نے اس مینار کی
بالائی منزل کو چاروں طرف سے بند کراکے اس پر اپنی ستاروں کی رفتار کاجائزہ لینے
والی بڑی دوربین فٹ کرا لی تھی۔ قصبے والوں کے لئے وہ ایک پر اسرار آدمی تھا۔بہتوں
کاخیال تھا کہ وہ پاگل ہے اسے آج تک کسی نے اس چار فرلانگ کے رقبے سے باہر نہ دیکھا
تھا۔
انسپکٹر فریدی کوٹھی کے قریب پہنچ کر سوچنے لگا کہ کس طرح اندر جائے دفتعاً ایک
نوکر برآمدے میں آیا فریدی نے آگے بڑھ کر ا سے پوچھا۔” اب نواب صاحب کی کیسی طبیعت
ہے۔“
” ابھی وہی حال ہے۔“ نوکر اسے گھورتا ہو ا بولا۔” آپ کہاں سے تشریف لائے ہیں۔“
” میں روزنامہ خبر “ کا نمائندہ ہوں اور کنور سلیم سے ملنا چاہتا ہوں۔“
” یہاں اندر ہال میں تشریف لائےے میں انہیں خبر کرتا ہوں۔“
فریدی برآمدے سے گذر کر ہال میں داخل ہوا۔ ہال کی دیواروں پر چاروں طرف نواب صاحب
کے آباﺅ اجداد کی قدآدم تصویریں لگی ہوئی تھیں ۔فریدی ان کا جائزہ لیتے لیتے چونک
پڑا۔ اس کی نظریں ایک پرانی تصویر پر جمی ہوئی تھیں اسے ایسا معلوم ہوا جیسے
مونچھوں اور ڈاڑھی کے پیچھے کوئی جانا پہچانا چہرہ ہے۔
”ارے وہ مارا بیٹا فریدی ۔“ وہ آپ ہی آپ بڑبڑایا۔
وہ قدموں کی آہٹ سے چونک پڑا سامنے کے دروازے میں ایک لمبا تڑنگا۔ نوجوان قیمتی سوٹ
میں ملبوس کھڑا تھا پہلے تو وہ فریدی کو دیکھ کر جھجکا پھر مسکراتاہوا آگے بڑھا
” صاحب آپ نامہ نگاروں سے تو میںتنگ آگیا ہوں۔“ وہ ہنس کر بولا۔” کہیے آپ کیا
پوچھنا چاہتے ہیں۔“
”شاید میں کنور صاحب سے ہم کلام ہونے کا شرف حاصل کر رہا ہوں“فرید ی نے ادب سے کہا۔
” جی ہاں مجھے کنور سلیم کہتے ہیں۔“ اس نے بے دلی سے کہا۔” جو کچھ پوچھنا ہو جلد
پوچھئے میں بہت مصروف آدمی ہوں۔“
” نواب صاحب کا اب کیا حال ہے۔“
” ابھی تک ہوش نہیں آیا اور کچھ۔“
” کب سے بے ہوش ہیں؟“
پندرہ دن سے فیملی ڈاکٹر کی رائے ہے کہ آپریشن کیا جائے۔ لیکن کرنل تیواری اس کے حق
میں نہیں ہیں“
|
