|
انسپکٹر فریدی بولا۔” اور وہ ایک غیر معمولی طاقتور انسان ہے داروغہ جی اس خنجر کے
بارے میں آپ کی کیا رائے ہے۔“
” خنجر ۔جی ہاں یہ بھی بہت مضبوط معلوم ہوتا ہے۔“ سب انسپکٹر مسکرا کر بولا۔
” جی نہیں میں اس کی ساخت کے بارے میں پوچھ رہاہوں ۔“
اس کی ساخت کے بارے میں صرف لوہار ہی بتا سکتے ہیں۔ “
” جی نہیں میں بھی بتا سکتا ہوں اس قسم کے خنجر نیپال کے علاوہ اور کہیں نہیں بنتے۔“
” نیپال “ ڈاکٹر شوکت تحیر آمیز لہجے میں بولا اور بے تابانہ انداز میں ایک قدم
پیچھے ہٹ گیا۔
”کیوں کیا بات ہے۔“ فریدی اسے گھورتا ہوا بولا۔
” کوئی بات نہیں ۔“ شوکت نے خود پر قابو حاصل کرتے ہوئے کہا۔
” خیر ہاں تو میں یہ کہہ رہا تھا کہ اس قسم کے خنجر سوائے نیپال کے اور کہیں نہیں
بنائے جاتے اور ڈاکٹر میں تم سے کہوں گا۔کہ “ ابھی وہ اتنا ہی کہہ پایا تھا کہ ایک
کانسٹیبل نے آکر اطلاع دی کہ اس شخص کا پتہ لگ گیا ہے جس سے کل رات سیتا دیوی کا
جھگڑا ہواتھا۔
سب لوگ بے تابانہ انداز میں دروازے کی طرف بڑھے۔ باہر ایک باوردی کانسٹیبل کھڑا تھا۔
آنے والے کانسٹیبل نے بتایا۔ رات سیتا دیوی اسی سے جھگڑ رہی تھی۔ وہ رات اس طرف سے
گذر رہا تھا کہ سیتا دیوی نے اسے پکارا اسے جلدی تھی کیونکہ وہ گشت پر جا رہا تھا۔
لیکن وہ پھر بھی چلا آیا۔ سیتا دیوی نے اسے بتایا کہ کوئی اور آدمی ان کی مرغیوں کی
تاک میںہے اور اس سے ادھر کا خیال رکھنے کی تاکید کی اس نے جواب دیاکہ پولیس مر
غیاں تاکنے کے لےے نہیں ہے اور پھروہ دوسری چوکی کا نسٹیبل ہے۔ اسی پر بات بگڑ گئی
اور جھگڑا ہونے لگا۔
تھانے کا داروغہ اسے الگ لے جا کر اس سے پوچھ گچھ کرنے لگا اور فریدی نے بلند آواز
میں کہنا شروع کیا” ہاں تو ڈاکٹر میں تم سے یہ کہہ رہا تھا کہ یہ خنجر دراصل تمہارے
سینے میں ہونا چاہئے تھا۔ سیتا دیوی دھوکے میں قتل ہوگئےں۔ اور جب قاتل کو اپنی
غلطی کا علم ہوگا تو وہ پھر تمہارے پیچھے پڑ جائے گا۔ اب پھر اسی کمرے میں چل کر
میں اس کی تشریح کروں گا۔“
اس انکشاف پر سب کے سب بوکھلا گئے شوکت بوکھلاہٹ میں جلدی جلدی پلکیں جھپکا رہاتھا۔
داروغہ جی کی آنکھیں حیرت سے پھٹی ہوئی تھیں اور سارجنٹ حمید انہیں معنی خیز انداز
سے گھور رہا تھا۔
سب لوگ پھر لاش والے کمرے میں واپس آئے۔ انسپکٹر فریدی کھڑکی سے کارنس پر اتر گیا
اور اس لائن کے سارے کمروں کی کھڑکیوں کا جائزہ لیتا ہوا لوٹ آیا۔
اب معاملہ بالکل ہی صاف ہو گیا کہ سیتا دیوی ڈاکٹر ہی کے دھوکے میں قتل ہو ئی
ہیں۔اگر قاتل سیتا دیوی کو قتل کرنا چاہتا تو اس کو کیا معلوم کہ سیتا دیوی شوکت کے
کمرے میں سوئی ہوئی تھیں اگر وہ تلاش کر تا ہوا اس کمرے تک پہنچا تھا تو دوسری
کھڑکیوں پربھی اس قسم کے نشانات ہو سکتے تھے۔جیسے کہ ا س کھڑکی پر ملے ہیں اور پھر
سیتا دیوی کے قتل کی صرف ایک ہی وجہ ہو سکتی تھی وہ انکی جائیداد ۔ اگر ان کا ترکہ
ان کے کسی عزیز کو پہنچتا ہوتا تو وہ انہیں اب سے دس برس قبل ہی قتل کردیتا یا
کرادیتا جب انھوں نے اپنی جائیداد دھرم شالہ کے نام وقف کرنے کاصرف ارادہ ہی کیا
تھا۔ اب جبکہ دس سال گزر چکے ہیں اور جائیداد کے متعلق قانونی وصیت محفوظ ہے۔ ان کے
قتل کی کوئی وجہ سمجھ نہیں آسکتی اگر قاتل چوری کی نیت سے اتفاقاً اسی کمرے میں
داخل ہوا، جس میں وہ سو رہی تھیں تو کیا وجہ ہے کہ کوئی چیز چوری نہیں کی گئی۔
” ممکن ہے اس کمرے میں اس کے داخل ہوتے ہی مقتولہ جاگ اٹھی ہو اور وہ پکڑے جانے کے
خوف سے اسے قتل کرکے کچھ چرا ئے بغیر ہی بھاگ کھڑا ہو اہو۔“ داروغہ جی نے اپنی
دانست میں بڑا تیر مارا۔
” مائی ڈیئر۔“ فریدی جوش میں بولا ” لیکن میں ثابت کر سکتاہوں کہ قاتل حملہ کے بعد
کافی دیر تک اس کمرے میں ٹھہرا ہے۔“
|
