|
بلاؤز
(سعادت حسن منٹو)
پہلے جب اسے کچا کیا گیا تھا تو اس پر سفید دھاگے کے بڑے
بڑے ٹانکے جا بجا پھیلے ہوئے تھے۔ پھر اس پر استری پھیری گئی جس سے سب شکنیں دور ہو
گئیں اور چمک بھی دوبالا ہو گئی۔اس کے بعد کچی حالت ہی میں شکیلہ نے اسے پہنا۔ رضیہ
کو دکھایا۔ دوسرے کمرے میں سنگھار میز کے پاس آئینے میں خود اس کو ہر پہلو سے اچھی
دیکھا۔ جب پورا اطمینان ہو گیا تو اسے اتارا۔ جہاں جہاں تنگ یا کھلا تھا وہاں نشان
لگائے۔ اس کی ساری خامیاں دور کیں ۔ ایک بار پھر پہن کر دیکھا جب بالکل فٹ ہو گیا
تو پکی سلائی شروع کی۔
ادھر ساٹن کا یہ بلاو ¿ز سیا جا رہا تھا ۔ ادھر مومن کے دماغ میں عجیب و غریب
خیالوں کے ٹانکے ادھڑ رہے تھے.... جب اسے کمرے میں بلایا جاتا اور اس کی نگاہیں
چمکیلی ساٹن کے بلاو ¿ز پر پڑتیں تو اس کا جی چاہتا کہ وہ ہاتھ سے چھو کر اسے دیکھے
صرف چھو کر ہی نہیں.... بلکہ اسکی ملائم اور روئیں دار سطح پر دیر تک ہاتھ پھیرتا
رہے۔ اپنے کھردرے ہاتھ۔
اس نے ان ساٹن کے ٹکڑوں سے اس کی ملائمت کا اندازہ کرلیا تھا۔ دھاگے جو اس نے ان
ٹکڑوں سے نکالے تھے اور بھی زیادہ ملائم ہو گئے تھے۔ جب اس نے ان کا گچھا بنایا تو
دباتے وقت اسے معلوم ہوا کہ ان میں ربڑی کی سی لچک بھی ہے....وہ جب بھی اندر آکر
بلاو ¿ز کو دیکھتا تو کا خیال فوراً ان بالوں کی طرف دوڑ جاتا جو اس نے شکیلہ کی
بغل میں دیکھے تھے۔ کالے کالے بال۔ مومن سوچتا تھا کہ وہ بھی ساٹن ہی کی طرح ملائم
ہوں گے؟
بلاو ¿ز بالآخر تیار ہو گیا....مومن کمرے کے فرش پر گیلا کپڑا پھیر رہا تھا کہ
شکیلہ اندر آئی۔ قمیض اتار کر اس نے پلنگ پر رکھی۔ اس کے نیچے اسی قسم کا سفید
بنیان تھا جس کانمونہ لے کر مومن بھاو ¿ دریافت کرنے گیا تھا.... اس کے اوپر شکیلہ
نے اپنے ہاتھ کا سلا ہوا بلاو ¿ز پہنا۔ سامنے کے ہک لگائے اور آئینے کے سامنے کھڑی
ہوگئی۔
مومن نے فرش صاف کرتے ہوئے آئینہ کی طرف دیکھا۔ بلاو ¿زمیں اب جان سی پڑ گئی تھی۔
ایک دو جگہ پر وہ اس قدر چمکتا تھا کہ معلوم ہوتا تھا ساٹن کا رنگ سفید ہو گیا
ہے....شکیلہ کی پیٹھ مومن کی طرف تھی جس پر ریڑھ کی ہڈی کی لمبی جھری بلاو ¿ز فٹ
ہونے کے باعث اپنی پوری گہرائی کے ساتھ نمایاں تھی۔ مومن سے رہا نہ گیا۔چنانچہ اس
نے کہا”بی بی جی، آپ نے درزیوں کو بھی مات کردیاہے۔“
شکیلہ اپنی تعریف سن کر خوش ہو ئی مگر وہ رضیہ کی رائے طلب کرنے کے لئے بے قرار
تھی۔ اس لئے وہ صرف ”اچھا ہے نا“ کہہ کر باہر دوڑ گئی....مومن آئینے کی طرف دیکھتا
رہ گیا جس میں بلاو ¿زکا سیاہ اور چمکیلا عکس دیر تک موجود رہا۔
رات کو جب وہ پھر اس کمرے میں صراحی رکھنے کے لئے آیا تو اس نے کھونٹی پر لکڑی کے
ہینگر میں اس بلاو ¿ز کودیکھا۔ کمرے میں کوئی موجود نہیں تھا۔ چنانچہ آگے بڑھ کر
پہلے اس نے غورسے دیکھا۔ پھر ڈرتے ڈرتے اس پر ہاتھ پھیرا۔ ایسا کرتے ہوئے یوں لگا
کہ کوئی اس کے جسم کے ملائم روئیں پر ہولے ہولے بالکل ہوائی لمس کی طرح ہاتھ پھیر
رہا ہے۔
رات کو جب وہ سویا تو اس نے کئی اوٹ پٹانگ خواب دیکھے....ڈپٹی صاحب نے پتھر کے
کوئلوں کا ایک بڑا ڈھیرے اسے کوٹنے کو کہا جب اس نے ایک کوئلہ اٹھایا اور اس پر
ہتھوڑے کی ضرب لگائی تو وہ نرم نرم بالوں کا ایک گچھا بن گیا....یہ کالی کھانڈ کے
مہین مہین تار تھے جن کو گولا بنا ہوا تھا....پھر یہ گولے کالے رنگ کے غبارے بن کر
ہوا میں اڑنے شروع ہوگئے.... بہت اوپر جا کر یہ پھٹنے لگے....پھر آندھی آگئی اور
مومن کی رومی ٹوپی کا پھندنا کہیں غائب ہو گیا.... پھندنے کی تلاش میں
نکلا....دیکھی اور ان دیکھی جگہوں میں گھومتا رہا....نئے لٹھے کی بو بھی یہیں کہیں
سے آنا شروع ہوگئی۔ پھر نہ جانے کیا ہوا....ایک کالی ساٹن کی بلاو ¿ز پر اس کا ہاتھ
پڑا .... کچھ دیر تک وہ کسی دھڑکتی ہوئی چیز پر اپنا ہاتھ پھیرتا رہا۔ پھر دفعتہ
ہڑبڑا کر اٹھ بیٹھا۔ تھوڑی دیر تک وہ کچھ سمجھ نہ سکا کیا ہوگیاہے۔ اس کے بعد اسے
خوف ، تعجب اور ایک انوکھی ٹیس کا احساس ہوا۔ اس کی حالت اس وقت عجیب و غریب
تھی....پہلے اس تکلیف دہ حرارت محسوس ہوئی۔ مگر چند لمحات کے بعد ایک ٹھنڈی سی لہر
اس کے جسم میں رینگنے لگی۔
|
