|
گڈریا
(اشفاق احمد)
پھر خود ہی بولے آہستہ آہستہ عادی ہو
جاؤ گے۔ وہ بول رہے تھے اورمیں مبہوت بیٹھا تھا۔ یوں لگ رہا تھا کہ ابھی ان کے
آخری جملے کے ساتھ نور کی لکیر متساوی الساقین بن کر ان کی کمر پر ابھر آئیں گی۔“
پھر داؤ جی دلی کے دنوں میں ڈوب گئے۔ ان کی آنکھیں کھلی تھیں وہ میری طرف دیکھ
رہے تھے لیکن مجھے نہیں دیکھ رہے تھے۔ میں نے بے چین ہو کر پوچھا۔ ”پھر کیا ہوا داؤ جی؟“انہوں نے کرسی سے اٹھتے ہوئے کہا ”رات بہت گزر چکی ہے اب تو سو جا ھر بتاؤں
گا۔“ میں ضدی بچے کی طرح ان کے پیچھے پڑ گیا تو انہوں نے کہا۔ ”پہلے وعدہ کر کہ
آئندہ مایوس نہیں ہوگا اور ان چھوٹی چھوٹی پراپوزیشنوں کو پتاشے سمجھے گا“ میں نے
جواب دیا۔ ”حلوہ سمجھو ںگا آپ فکر نہ کریں“ انہوںنے کھڑے کھڑے کمبل لپیٹتے ہوئے کہا
۔ ”بس مختصر یہ کہ میں ایک سال حکیم صاحب کی حضوری میں رہا اور اس بحرعلم سے چند
قطرے حاصل کر کے اپنی کور آنکھوں کو دھویا۔ واپسی پر میں سیدھا اپنے آقا کی خدمت
میں پہنچا اور ان کے قدموں پر سر رکھ دیا۔ فرمانے لگے چنت رام اگر ہم میں قوت ہو تو
ان پاؤں کوکھینچ لیں۔ اس پر میں رودیا تو دست مبارک محبت سے میرے سر پر پھیرکر
کہنے لگے، ہم تم سے ناراض نہیں ہیں لیکن ایک سال کی فرقت بہت طویل ہے۔ آئندہ کہیں
جانا ہو تو ہمیں بھی ساتھ لے جانا، یہ کہتے ہوئے داؤ جی کی آنکھوں میں آنسو آگئے
اور وہ مجھے اسی طرح گم سم چھوڑ کر بیٹھک میں چلے گئے۔“
امتحان کی قربت سے میرا خون خشک ہو رہا تھا لیکن جسم پھول رہا تھا۔ داؤ جی کو
میرے موٹاپے کی فکر رہ نے لگی۔ اکثر میرے تھن متھنے ہاتھ پکڑ کر کہتے۔ ”اسپ تازی بن
طویلہ خر نہ بن۔“ مجھے ان کا یہ فقرہ بہت نا گوار گزرتا اور میں احتجاجاً ان سے
کلام بند کردیتا۔ میرے مسلسل مرن برت نے بھی ان پر کوئی اثر نہ لیا اور ان کی فکر،
اندیشہ کی حد تک بڑھ گئی۔ ایک صبح سیر کو جانے سے پہلے انہوں نے مجھے آجگایا اور
میری منتوں، خوشامدوں ، گالیوں اور جھڑکیوں کے باوجود بستر سے اٹھا کوٹ پہنا کر
کھڑا کردیا۔ پھر وہ مجھے بازو سے پکڑ کر گویاگھسیٹتے ہوئے باہر گئے۔ سردیوں کی صبح
کوئی چار بجے کا عمل۔ گلی میں آدم نہ آدم زاد، تاریکی سے کچھ بھی دکھائی نہ دیتا
تھا اور داؤ جی مجھے اسی طرح سیر کو لے جا رہے تھے ۔ میں کچھ بک رہا تھا اور وہ
کہہ رہے تھے ابھی گراں خوابی دور نہیں ہوئی ابھی طنبورا بڑبڑا رہا ہے۔تھوڑے تھوڑے
وقفہ کے بعد کہتے کوئی سر نکال طنبورے کی آہنگ پر بج یہ کیا کر رہا ہے! جب ہم بستی
سے دور نکل گئے اور صبح کی یخ ہوا نے میری آنکھوں کو زبردستی کھول دیا تو داؤ جی
نے میرا بازو چھوڑ دیا۔سرداروں کا رہٹ آیا اور نکل گیا۔ ندی آئی اور پیچھے رہ گئی۔
قبرستان گزر گیا مگر داؤ جی تھے کہ کچھ آیتیں ہی پڑھتے چلے جا رہے تھے۔ جب تھبہ
پر پہنچے تو میری روح فنا ہو گئی۔یہاں سے لوگ دوپہر کے وقت بھی نہ گزرتے تھے کیونکہ
پرانے زمانے میں یہاں ایک شہر غرق ہو ا تھا۔ مرنے والوں کی روحیں اسی ٹیلے پر رہتی
تھیں اور آنے جانے والوں کا کلیجہ چبا جاتی تھیں۔ میں خوف سے کانپنے لگا تو داؤ
جی نے میرے گلے کے گرد مفلر اچھی طرح لپیٹ کر کہا ۔
سامنے ان دو کیکروں کے درمیان اپنی پوری رفتار سے دس چکر لگاؤ، پھر سو لمبی
سانسیں کھینچو اور چھوڑ دو، تب میرے پاس آؤ، میں یہاں بیٹھتاہوں، میں تھبہ سے جان
پچانے کے لئے سیدھا ان کیکروں کی طرف روانہ ہو گیا۔ پہلے ایک بڑے سے ڈھیلے پر بیٹھ
کر آرام کیا اور ساتھ ہی حساب لگایا کہ چھ چکروں گا وقت گزر چکا ہوگا، اس کے بعد
آہستہ آہستہ اونٹ کی طرح کیکروں کے درمیان دوڑنے لگا اور جب دس یعنی چار چکر پورے
ہوگئے تو پھر اسی ڈھیلے پر بیٹھ کر لمبی لمبی سانسیں کھینچنے لگا۔ ایک تو درخت پر
عجیب و غریب قسم کے جانور بولنے لگے تھے دوسرے میری پسلی میں بلا کا درد شروع ہو
گیا تھا۔یہی مناسب سمجھا کہ تھبہ پر جاکر داؤ جی کو سوئے ہوئے اٹھاؤں اور گھر
لے جا کر خوب خاطر کروں؟ غصہ سے بھرا اور دہشت سے لرزتا میں ٹیلے کے پاس پہنچا۔ داؤ جی تھبہ کی ٹھیکریوں پر گھنٹوں کے بل گرے ہوئے دیوانوں کی طرح سر مار رہے تھے اور
اونچے اونچے اپنا محبوب شعر گار ہے تھے۔
جنا کم کن کہ فردا روز محشر
بہ پیش عاشقاں شرمندہ باشی!
کبھی دونوں ہتھیلیاں زور سے زمین پر مارتے اور سر اوپر اٹھا کر انگشت شہادت فضا میں
یوں ہلاتے۔
|
